Gəncədə saxta spirtli içkilərin satışının həyata keçirildiyi aşkar olunub. Bu haqda 6 yanvar tarixində Azərbaycan Respublikasının Qida Təhlükəsizliyi Agentliyinə (AQTA) istinadən məlumat veririk.
AQTA müfəttişləri Sadıllı qəsəbəsində fəaliyyət göstərən “Kəmalə” marketində plandankənar yoxlama keçiriblər. Nəticədə müəssisədə qida təhlükəsizliyi sahəsində normativ hüquqi aktların tələblərinin kobud surətdə pozulduğu məlum olub.
Belə ki, marketdə üzərində istehsal tarixi qeyd olunmayan 68 ədəd 0.7 l-lik “Zakaznaya”, 18 ədəd 0.5 l-lik “Leopard”, 6 ədəd 0.7 l-lik “Leopard”, 5 ədəd 0.5 l-lik “Naturalnaya”, 3 ədəd 0.7 l-lik “Himalay ayısı”, 1 ədəd 0.5 l-lik “Moskovskie veçera”, 1 ədəd 0.7 l-lik “Qaraçanaq”, 2 ədəd 1 l-lik “Quseynoff” əmtəə nişanlı orqanik alkoqollu içkilərin, həmçinin 85 ədəd 1.75 l-lik “Ağsu damcısı” əmtəə nişanlı alkoqollu içkinin satışının həyata keçirilməsi üzə çıxıb.
Məhsullardan nümunələr götürülərək Azərbaycan Qida Təhlükəsizliyi İnstitutunun laboratoriyasına təqdim olunub. Burada 5 nümunənin tərkibində tündlüyün (“Naturalnaya” 31,6%, “Leopard” 31,3%, “Himalay ayısı” 31,7%, “Ağsu damcısı” 32,8%, “Zakaznaya” 31,6%), eyni zamanda “Ağsu damcısı” əmtəə nişanlı alkoqollu içkidə metil spirtinin həcm payının (0.03%) müvafiq normativ tələblərlə uyğunsuzluq təşkil etdiyi müəyyən edilib. Həmçinin alkoqollu içkilərin etiket məlumatlarındakı müvafiq göstəricilər arasında da uyğunsuzluğun olması faktı aşkarlanıb.
Sahibkar barəsində inzibati protokol tərtib olunub, icrası məcburi göstərişlər verilib.
