Gəncə şəhərində 20 yaşlı oğlan özündən üç yaş böyük olan tanışına xəsarət yetirib.
Belə ki, 2005-ci il təvəllüdlü Muraz Ələddin İmanovla Gəncədə "Manqal Kabab" adlı dönərxanada mübahisə edib. Mübahisədən bir neçə saat sonra isə Ələddin İmanova bıçaqla xəsarətlər yetirib.
Murazın barəsində Cinayət Məcəlləsinin müxtəlif maddələri ilə ittiham elan edilib.
İş üzrə izahat verən Muraz ona elan olunan ittiham üzrə özünü qismən təqsirli bilib.
O, ifadəsində göstərib ki, dostu Ayxan İsgəndərov mobil telefonunda internet şəbəkəsi olmadığından, onunla birlikdə sonuncunun işlədiyi "Manqal Kabab" adlı dönərxanaya gediblər.
"Dostumun iş yoldaşı olan Ələddin İmanov onun işdən tez çıxdığını bəhanə etdi, ona səsini yüksəltdi və təhqiramiz ifadələr işlətdi. Mən isə Ələddinə iradımı bildirəndə aramızda mübahisə yarandı. Bir neçə saat sonra Ələddin İmanov dostum Ayxanla məni görüşə dəvət etdi. Görüşəndə yenidən dava etdik və Ələddinin əlinə, döş qəfəsinə bıçaqla xəsarətlər yetirdim", - deyə təqsirkar bildirib.
Gəncə Ağır Cinayətlər Məhkəməsinin hökmü ilə Muraz 4 il 3 ay müddətinə azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyən edilib.
