Gəncə şəhərinin Mahrasa bağı yaşayış massivində, Şota Rustaveli küçəsində yerləşən 21 nömrəli binanın sakinləri görülən yol işlərindən narazılıq ediblər.
Gencexeber.az-ın məlumatına görə, sakinlər ərazidə çəkilən asfalt örtüyünün çox nazik və keyfiyyətsiz şəkildə salınmasına görə etiraz ediblər. Onlar bildiriblər ki, asfalt yalnız bir qat vurulub, binanın bloklarının qarşısına isə ümumiyyətlə asfalt salınmayıb.
Sakinlərin iddiasına görə, piyada hərəkəti üçün nəzərdə tutulan hissə tamamilə aradan qaldırılıb. Nəticədə, binanın qarşısı avtomobillərin dayanacağına çevrilib və uşaqların təhlükəsiz hərəkəti çətinləşib.
Sakinlər aidiyyəti qurumlardan məsələ ilə maraqlanmağı, yol və bordür işlərinin məntiqə uyğun şəkildə tamamlanmasını tələb edirlər.
