Güclü küləyin şəhər ərazisində yaratdığı fəsadlar aradan qaldırılır. Bu haqda 21 iyun tarixində Report-a istinadən xəbər veririk.
Təbii fəlakət nəticəsində Nizami Gəncəvi prospektində yerləşən obyektlərdən birinin dam örtüyü qoparaq yolun hərəkət hissəsinə düşüb. Bu da nəqliyyatın hərəkətində çətinliklər yaradıb. Yola düşən dam örtüyü Gəncə Şəhər Mənzil Kommunal Təsərrüfatı İstehsalat Birliyinin (MKTİB) xüsusi texnikaları vasitəsilə götürülüb və prospektdə nəqliyyatın hərəkəti bərpa edilib. Güclü külək, eyni zamanda 3 evin dam örtüyünü dağıdıb.
Şəhərin bəzi ərazilərində yüksək gərginlikli xətlərin qırılması halları da olub. Baş vermiş qəza aradan qaldırılıb və şəhərdə elektrik enerjisinin verilişi bərpa edilib.
Qeyd olunur ki, qeyri-sabit hava şəraiti ilə əlaqədar olaraq Gəncə Şəhər İcra Hakimiyyəti başçısı yanında fəaliyyət göstərən Fövqəladə Hallar Komissiyası gücləndirilmiş iş rejimində çalışır. Niyazi Bayramovun tapşırığına uyğun olaraq, MKTİB-nin əməkdaşları tərəfindən küləyin fəsadlarının aradan qaldırılması istiqamətində görülən işlər yekunlaşmaq üzrədir.
