Gəncə şəhərinin ən qədim məzarlıqlarından biri olan 1 saylı qəbiristanlıqda xoşagəlməz mənzərə yaranıb.
Gencexeber.az-a müraciət edən vətəndaşların sözlərinə görə, şəhər sakinləri arasında daha çox Köhnə Səbiskar kimi tanınan qəbiristanlığın ərazisini alaq otları və kol-kos basıb. Ərazidə eyni zamanda müxtəlif məişət tullantılarının da toplandığı müşahidə olunur.
Sakinlər bildirirlər ki, qəbiristanlığın bəzi hissələrində məzarların ətrafının tamamilə ot basması ziyarətə gələn insanların hərəkətini çətinləşdirir və əraziyə baxımsız görüntü verir.
Qeyd edək ki, bundan əvvəl xeyirxah şəxslərin dəstəyi ilə qəbiristanlıqda abadlıq işləri aparılıb. Həmin işlər çərçivəsində təxminən 1500 kvadratmetr sahədə daxili yollara asfalt örtüyü döşənib.
Tarixi təxminən 600 ilə çatan qəbiristanlığın ümumi ərazisi 7 hektara yaxındır. Son bir il ərzində burada yağış sularının axıdılması məqsədilə drenaj və kanalizasiya sistemləri çəkilib, həmçinin 1300 kvadratmetr sahədə daxili yollar tamet daşları ilə örtülüb.
Sakinlər qəbiristanlığın ərazisində təmizlik və abadlıq işlərinin davamlı şəkildə aparılmasını, alaq otlarının biçilməsini və zibillərin təmizlənməsini istəyirlər.
