“Kəpəz”in 16 yaşadək oğlanlardan ibarət komandası növbəti 10 ev oyununu azarkeşsiz keçirəcək. Bu haqda 10 may tarixində Report-a istinadən xəbər veririk.
“Kəpəz” - “Qəbələ” matçı bitdikdən sonra təmsilçimizin iki azarkeşinin meydana daxil olaraq rəqib komandanın futbolçularını vurmaqları barədə məlumat paylaşmışdıq. AFFA İntizam Komitəsi bu barədə qərar çıxarıb. Qərara əsasən, Uşaq və gənclər liqalarında pul cəriməsi olmasa da, azarkeşlərin hərəkətinə görə müstəsna hal kimi Gəncə klubu 500 manat cərimələnib.
Bundan əlavə, “Kəpəz”in 4 futbolçusu İntizam Komitəsi tərəfindən ağır cəzalandırılıb. Rəqib həmkarlarını vuran Tunar Əfəndiyev 4, Cavanşir Əliyev və Rahib Qurbanov isə hərəyə 6 oyunluq diskvalifikasiya ediliblər. Cavanşirlə Rahibin cəzaları bütün liqalara şamil olunacaq.
“Kəpəz”in digər futbolçusu Yəhya Muradov isə qarşılaşmanın 78-ci dəqiqəsində rəqib futbolçunu təhqir etdiyinə görə 3 oyun cəzalanıb.
