Xəbər verdiyimiz kimi, azərbaycanəsilli ukraynalı dövlət xadimi Teymur Firudin oğlu Tkaçenko (Məmmədov) iyulun 22-də Kiyev Vilayət Dövlət Administrasiyasının rəhbəri (qubernatoru) təyin olunub.
Onun dosyesini təqdim edirik:
Ali təhsilini Taras Şevçenko adına Kiyev Milli Universitetində alan Teymur Tkaçenko əvvəlcə beynəlxalq iqtisadiyyat ixtisası üzrə magistr dərəcəsi qazanıb. Sonradan isə həmin ali məktəbdə hüquqşünaslıq üzrə ikinci ali təhsil alıb.
2012-ci ildən Ukrayna Ali Radasında "UDAR" Partiyasını təmsil edən deputatın köməkçisi vəzifəsində iki il parlamentdə çalışıb.
2015–2016-cı illərdə "Kyivblahoustriy" kommunal müəssisəsində şöbə müdiri, 2016–2017-ci illərdə isə paytaxtın sahil zonalarının inkişafına cavabdeh olan "Pleso" kommunal müəssisəsinin rəhbəri olub.
2018-ci ildə Qolosivski Rayon Dövlət Administrasiyasının aparat rəhbəri təyin edilən Tkaçenko bir il sonra Darnitski Rayon Dövlət Administrasiyası sədrinin müavini vəzifəsinə yüksəlib. 2020-ci ildən isə Kiyev Şəhər Dövlət Administrasiyasının Şəhər Abadlaşdırma Departamenti direktorunun birinci müavini olub.
2023-ci ilin avqustunda Ukrayna Prezidentinin fərmanı ilə Strateji Sənaye Məsələləri nazirinin müavini təyin edilib. 2024-cü il sentyabrın 27-də isə Ukraynanın İcmaların və Ərazilərin İnkişafı nazirinin müavini vəzifəsinə gətirilib.
Ukrayna Prezidentinin fərmanı ilə Kiyev Şəhər Hərbi Administrasiyasının rəhbəri təyin olunub. O, 2026-cı il iyulun 16-da bu vəzifədən azad edilib.
Cəmi bir neçə gün sonra – 22 iyul 2026-cı ildə Teymur Tkaçenko Kiyev Vilayət Dövlət Administrasiyasının rəhbəri vəzifəsinə təyin olunub.
