Ali Məhkəmədə xuliqanlıqda təqsirləndirilən Ceyhun Babalının (soyadı şərtidir) barəsindəki qərardan zərərçəkmiş tərəfindən verilən kassasiya şikayəti üzrə məhkəmə iclası başa çatıb.
Pravda.аz xəbər verir ki, hakim Teyyub Muxtarovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
İttihama görə, hadisə 30 noyabr 2023-cü il tarixdə, saat 12 radələrində Gəncə şəhəri, Nizami prospektində dayanıqlı vəziyyətdə olan "Mersedes Sprinter" markalı mikroavtobusda qeydə alınıb.
Belə ki, Ceyhun Babalı mikroavtobusun arxa oturacağında əyləşmiş keçmiş arvadı, zərərçəkmiş Günay İsmayılovanın (şərti) yanında əyləşib. Sonra o, qadının naməlum avtomobildən düşməsini bəhanə edərək, turist bıçağı ilə zərərçəkmiş şəxsə qəsdən zərbələr endirib.
Hadisədən sonra Ceyhun Babalı saxlanılaraq cinayət məsuliyyətinə cəlb edilib.
Zərərçəkmiş Günay İsmayılova ifadəsində bildirib ki, Ceyhunla 2018-ci ildə ailə qurub və 2022-ci ildə aralarında yaranmış münaqişəyə görə ayrılıb. Onlar ayrıldıqdan sonra birgə nikahdan olan 2 övladını eks-əri ona verməyib. Buna görə də qadın Ceyhuna qarşı Gədəbəy Rayon Məhkəməsində uşaq tələbinə dair iddia qaldırıb. Həmin məhkəmə prosesinin davam etdiyi bir ərəfədə Ceyhun vatsap vasitəsi ilə səs göndərərək uşağı ondan tələb etməyə davam edəcəyi təqdirdə onu öldürəcəyini bildirib.
Günay İsmayılova qeyd edib ki, məhkəmə prosesinin keçiriləcəyi gün, yəni 30 noyabr 2023-cü il tarixdə avtovağzalda Gədəbəy rayonuna gedən mikroavtobusa minib:
“Təxminən 10-15 dəqiqə sonra Ceyhun da mikroavtobusa əyləşdi. Sonra baş və boyun nahiyəmə bıçaqla xəsarət yetirdi, əl-ayaq zərbələri vurdu. Daha sonra mikroavtobusun arxa oturacağından tanımadığım şəxslər arxa qapını açıb məni oturacaqların altından dartıb çıxardı. Təxminən 20-25 dəqiqədən sonra təcili tibbi yardım maşını ilə xəstəxanaya aparıldım. Hadisəni törətdikdən sonra Ceyhun qaçmaq istəyərkən avtovağzalın çıxışında polis tərəfindən saxlanıldı”.
Gəncə Şəhər Məhkəməsinin hökmü ilə Ceyhun Babalı 2 il 6 ay müddətinə azadlıqdan məhrum edilib. Hökmdən məhkumun müdafiəçisi və zərərçəkmiş şəxs apellyasiya şikayətləri verib. Gəncə Apellyasiya Məhkəməsi hökmü dəyişdirmədən saxlayıb. Daha sonra Günay İsmayılova kassasiya şikayəti ilə Ali Məhkəməyə müraciət edib.
