Bu gün Nizami yurdunun görkəmli aktyoru Azərbaycanın Xalq artisti Məmmədrza Şeyxzamanovun doğum günüdür.
Məmmədrza İsa oğlu Şeyxzamanov 4 avqust 1915-ci ildə anadan olub. Aktyorun sənətinə olan sevgisi hələ Gəncə İnşaat Universitetində oxuyarkən yaranıb. Tələbə vaxtı dram dərnəyində iştirak edən aktyoru Gəncə Dram teatrının rejissoru Həbib İsmayılov görür və onu truppaya dəvət edir. İlk dəfə Ə.Həmidin "Hind qızı" tamaşasında Brahma adlı kiçik rolda çıxış edir. Bu, gələcək aktyorun peşəkar teatr səhnəsinə, sənət zirvəsinə doğru aparan yolda atdığı ilk uğurlu addımı olur.
1954-cü ildə Mədəniyyət Nazirliyinin əmri ilə M.Əzizbəyov adına Azərbaycan Dövlət Akademik Dram Teatrında işə başlayır. Burada "Göz həkimi"ndə Şahbazov, "Qış nağılı"nda Poliksen, "Fərhad və Şirin"də Xosrov, "Vaqif"də Qacar, "Otello"da Otello, "Aydın"da Aydın, "Qaçaq Nəbi"də Qaçaq Nəbi kimi bir-birindən fərqlənən obrazlar yaradır.
Şeyxzamanov böyük ekrana ilk dəfə 1955-ci ildə "Bəxtiyar" filmində Rəcəbov rolu ilə çıxır. Bununla da kino yolunda ilk uğurunu qazanır və bir çox kinolarımızda bir-birindən fərqli və yaddaqalan rollara imzasını atır.
Məmmədrza Şeyxzamanov 25 yanvar 1984-cü ildə 68 yaşında vəfat edib.
