6 yaşlı qız sahibsiz itlərin hücumu zamanı xəsarətlər alıb.
Gencexeber.az-a verilən məlumata görə, hadisə Göygöl rayonunun Murovdağ qəsəbəsində qeydə alınıb. 2020-ci il təvəllüdlü azyaşlı yaşadığı evin qapısı ağzında olarkən sahibsiz itlərin hücumuna məruz qalıb. Uşaq yerə yıxılıb, heyvanlar isə onu əl, çiyin, qol nahiyəsindən, eləcə də qulağından dişləyiblər.
Hadisəyə şahid olan babası itləri qovaraq nəvəsini əvvəlcə rayon xəstəxanasına çatdırıb. Orada azyaşlıya ilkin tibbi yardım göstərilib. Daha sonra isə o, Gəncə şəhərində yerləşən özəl tibb müəssisələrindən birinə aparılıb və yaralarına tikiş qoyulub.
Hazırda həkim nəzarətində olan uşağa quduzluğa qarşı zərdab və digər zəruri preparatlar vurulub. Ona ümumilikdə 5 doza peyvənd təyin edilib.
