Gəncə sakini itkin düşmüş ailə üzvlərini axtarır. Bu haqda 3 may tarixində İctimai Televiziyaya istinadən xəbər veririk.
Söhbət Tahir Seyidovdan gedir. O, 32 ildir ki, ata, ana və qardaşını axtarır. Əslən Qərbi Azərbaycandan olan Hidayət Bəhram oğlu Allahverdiyev, Simuzər Huseynalı qızı Allahverdiyeva və Bəhram Hidayət oğlu Allahverdiyev 1992-ci ildə baş vermiş Xocalı faciəsi zamanı itkin düşüblər.
Tahirin sözlərinə görə, o, yay tətilini Göyçə mahalına gedib atasını, anasını, qardaşını ziyarət edib. 1988-ci ildə ermənilərin törətdiyi vandalizm nəticəsində ailəsi oradan köçkün düşərək Azərbaycana gəlib. Bir müddət özünün yanında yaşayıblar. Daha sonra köç ediblər Şuşaya, oradan da Xocalıya. Xocalı faciəsi zamanı ailə atışmadan qorunmaq üçün evin zirzəmisində gizlənib. İnsanların şəhəri tərk etdiyini bildikdən sonra artıq gec olub. Erməni silahlıları başlarının üstünü kəsiblər. Onların sonrakı aqibəti məlum olmayıb. Tahir valideynlərinin sorağı ilə Ağdama gəlib.
“Dedilər ki, bir ailə gəlib Xocalıdan. Onlar da Qərbi Azərbaycandandırlar. Həmin şəxslər dedilər ki, sizin ailənizi orada gördük, açıq demədilər, belə çıxdı ki, onlar orada qətlə yetiriliblər. Ondan sonra axtardım, hər yerə müraciət elədim, qohum-əqrabaya, bütün qohumlara da tapşırdıq ki, kim Xocalıdan adam görsə, soruşsun”, - deyə Tahir qeyd edib.
Həmin şəxs bioloji nümunə verərək ailəsinin, heç olmasa, qalıqlarını tapıb, dəfn etməyi özünə övlad borcu bilir.
Qeyd edək ki, hazırda Ermənistanın Azərbaycana qarşı hərbi təcəvüzü nəticəsində itkin düşən vətəndaşların sayı 3928 nəfərdir.
