Gəncə təmsilçisi növbəti dəfə cəzalandırılıb. Bu haqda 8 may tarixində PFL-ə istinadən məlumat veririk.
Bu gün İntizam Komitəsinin iclası keçirilib. Burada “Kəpəz” – “Sumqayıt” oyununa baxış olub. Matçın 90+2-ci dəqiqəsində “Kəpəz”in 24 nömrəli futbolçusu Olavale Onanuqa hakimi təhqir etdiyinə görə birbaşa qırmızı vərəqə aldığı üçün 2 oyun şərti olmaqla 4 oyun cəzalandırılıb. Klub isə 3000 manat cərimə edilib.
Oyunun 90+6-cı dəqiqəsində “sarı-göylər”in 21 nömrəli futbolçusu Martins Junior rəqib komandanın texniki zonasına qeyri-etik ifadələr işlətdiyinə, onları təhqir etdiyinə görə 4 oyun cəzalandırılıb. “Kəpəz” əlavə 3000 manat cərimə edilib.
Komandamızın 4 futbolçusu sarı vərəqə aldığı üçün 700 manat cərimə təyin olunub. Həmçinin “Kəpəz”in azarkeşləri tərəfindən meydançaya kənar əşyalar atıldığına görə klub 800 manat məbləğində cəzalandırılıb.
Bundan başqa, “sarı-göylər”in azarkeşləri kütləvi şəkildə hakimləri təhqir ediblər. Bu səbəbdən kluba 1000 manat cərimə təyin olunub.
Ümumilikdə “Kəpəz” – “Sumqayıt” matçına görə komanda 8500 manat məbləğində cərimələnib.
