Gəncədə sakinlərin narazılığından sonra müvafiq tədbirlər həyata keçirilib.
Gencexeber.az məlumat verir ki, Gəncə şəhərinin Tağı Arani küçəsində, sakinlər arasında "İmperialın dördyolu" kimi tanınan "Dubay bazarı" istiqamətinə gedən yolda antisanitar vəziyyət narazılığa səbəb olub. Belə ki, avtobus dayanacağının yaxınlığında yerləşən məişət tullantıları konteynerləri dolub-daşıb.
İsti havalarda əraziyə yayılan kəskin üfunət avtobus gözləyən sakinlər üçün ciddi narahatlıq yaradıb. Sakinlərin sözlərinə görə, konteynerlərin ətrafına müxtəlif məişət tullantıları atılıb. Hətta bir aya yaxın müddətdə ərazidə atılmış unitazın götürülmədiyi bildirilib.
Mənzil Kommunal Təsərrüfatı İstehsalat Birliyindən redaksiyamıza məlumat verilib ki, qeyd olunan ərazidə təmizlik işləri aparılıb: "Sözügedən ünvanda yerləşən konteynerlər boşaldılıb, ətrafı isə təmizlənib".
Əlavə edilib ki, təmir tullantıları nə məişət tullantıları üçün nəzərdə tutulan konteynerlərə, nə də ki, onların ətrafına atılmalı deyil. Bu cür hərəkətlərə yol verən sakinlər barəsində isə inzibati qaydada cərimə tətbiq edilir:
"Yaşayış binalarındakı mənzillərinin və ya həyət evlərinin təmirini etdirmək istəyən sakinlər təmir zamanı evlərindən çıxan təmir tullantılarının daşınmasının və utilizasiyasının təşkili üçün MKTİB-yə əvvəlcədən müraciət edərək müqavilə bağlanmalıdır. Birliyin mütəxəssisləri müraciət əsasında ünvana gəlib tullantıların miqdarını təyin etdikdən sonra sakinə xidmət haqqını bildirərək onun razılığı ilə müqavilə bağlayır. Sonrası isə, necə deyillər, "texnika işidir".
