Azərbaycanda hərbi qulluqçuların pensiyalarının gecikdirilməsi ilə bağlı şikayətlər var. Bu barədə Qafqazinfo-ya istinadən məlumat veririk.
Sosial şəbəkələrdə iddia olunur ki, hər ayın 15-i hərbçilərə pensiya ödənişi olunsa da, bu ay yubanma olub. Avqustun 16-sı Dövlət Sərhəd Xidməti, Daxili Qoşunlarda xidmət etmiş hərbçilərin pensiyaları verilsə də, digərləri hələ də pensiya ala bilməyiblər.
Yaranmış problemlə əlaqədar Dövlət Sosial Müdafiə Fonduna müraciət edilib. Qurumdan sorğuya cavab verilib: “Pensiyaların ödənişində hər hansı bir gecikmə yoxdur. Respublika üzrə avqust ayının pensiylarının ödənişi davam etdirilir. Avqustun 9-da Bakı və Sumqayıt şəhərləri, eləcə də Abşeron rayonu üzrə, avqustun 15-dən isə respublikanın ayrı-ayrı rayonlarında qeydiyyatda olan pensiyaçıların təqaüdləri ödənilib.
Güzəştli şərtlərlə pensiya alan şəxslərin pensiyalarının maliyyələşdirilməsi başa çatdırılıb. Ödəniş isə banklar vasitəsi ilə davam etdirilir. Günün sonunadək proses tam başa çatdırılacaq”.
Fonddan həmçinin bildirildi ki, avqust ayı başa çatmamış həmin ayın pensiyalarının ödənişi yekunlaşdırılacaq.
