Gəncədə şəhidlərin əziz xatirəsi yad olunub. Bu haqda 27 sentyabr tarixində İcra Hakimiyyətinə istinadən məlumat veririk.
Anım Günü ilə əlaqədar şəhər sakinləri və rəsmi şəxslər Şəhidlər xiyabanına baş çəkiblər. Burada icra başçısı Niyazi Bayramov, Quru Qoşunlarının general-mayorları Vasif Kazımov, İslam Əmirağayev, Türkiyənin Gəncədəki Baş konsulu, YAP Gəncə şəhər təşkilatının sədri, Qafqaz Müsəlmanları İdarəsinin Qazılar Şurasının nümayəndəsi, Rus Pravoslav Kilsəsinin Baş keşişi, Gəncədəki Yahudi Dini İcmasının sədri, məhkəmə sədrləri, İcra Hakimiyyəti başçısı Aparatının məsul əməkdaşları, bələdiyyə sədrləri, hüquq-mühafizə orqanlarının, idarə, müəssisə və təşkilat rəhbərləri, din xadimləri, müharibə iştirakçıları, şəhid ailələri və ictimaiyyət nümayəndələri iştirak ediblər.
Əvvəlcə rəsmilər Azərbaycanın ərazi bütövlüyü uğrunda gedən döyüşlərdə itkin düşmüş hərbçilərin adları əks olunan abidəni ziyarət edib, önünə gül dəstələri düzüblər. Daha sonra Niyazi Bayramov və general-mayor Vasif Kazımov “Əbədi məşəl” abidəsi önünə əklil qoyublar. Hərbi orkestrin ifasında Dövlət Himni səsləndirilib.
Anım mərasimində şəhidlərin əziz xatirəsi 1 dəqiqəlik sükutla yad edilib. Avtomobillər, yanğınsöndürən maşınlar vasitəsilə saat 12:00-da səs siqnalları verilib.
Daha sonra rəsmilər Ermənistan silahlı qüvvələrinin Gəncəni raket atəşinə tutması nəticəsində dağılan ərazini ziyarət edib, burada həlak olan mülki şəhidlərin şəkil və məlumatlarını əks etdirən lövhəyə baxış keçiriblər. Əraziyə gül dəstələri düzülüb.
Tədbirlərin davamı olaraq, Heydər Əliyev Park-Xiyaban Kompleksinin ərazisində şəhidlərimizin xatirəsinə həsr olunan ağacəkmə aksiyası keçirilib. Burada şəhərin iqlim şəraitinə uyğun olan ağaclar əkilib. Aksiyaya Niyazi Bayramov, idarə, müəssisə və təşkilat rəhbərləri qatılıblar.
[modula id="46833"]
