Gəncəli idmançılar region yarışında uğurlu çıxış ediblər. Bu haqda 10 may tarixində Həndbol Federasiyasına istinadən məlumat veririk.
Şirvan Olimpiya İdman Kompleksində həndbol üzrə Azərbaycan birinciliyinin zona yarışı təşkil olunub. Burada 2008-ci il təvəllüdlü və daha kiçikyaşlı qızlar mübarizə aparıblar.
Turnirin sonunda Nizami yurdunu təmsil edən komanda ikinci yerə layiq görülüb. Beləliklə, həndbolçularımız iyunda Bakıda təşkil olunacaq Azərbaycan birinciliyinin final mərhələsində iştirak hüququ əldə ediblər.
Qeyd edək ki, zona birinciliyi Gənclər və İdman Nazirliyi, Azərbaycan Həndbol Federasiyasının birgə təşkilatçılığı ilə baş tutub.
