İmişlinin 8 il 6 ay həbsə məhkum edilmiş sabiq icra başçısı Vilyam Hacıyevin müsadirə edilən daha bir əmlakı satılıb.
Qafqazinfо.аz xəbər verir ki, söhbət onun əvvəl prokuror işləyən oğlu Məhəmməd Hacıyevə aldığı "Range Rover"dən gedir.
Məhkəmə həmin avtomobilin cinayət yolu ilə qazanılmış pullar hesabına alındığını təsdiq etdikdən sonra maşın müsadirə edilmişdi.
Məhəmmədin "Range Rover"i əvvəl 56 min manata satışa çıxarılsa da, sonda 47 min 500 manata satılıb.
Satışdan əldə olunan pul dövlətə nəfinə keçəcək.
Qeyd edək ki, müsadirədən sonra Məhəmmədlə həyat yoldaşı bu avtomobilə görə məhkəməlik olub. Hacıyevin həyat yoldaşı iddia edirdi ki, "Range Rover" birgə evlilik dövründə alınıb, bu səbəbdən pay hüququ var. Lakin iddia qəbul edilməmişdi.
Xatırladaq ki, əslən Göygöl rayonundan olan Vilyam Hacıyev 2004-2006-cı illərdə Göygölün, 2006-2012-ci illərdə isə Samuxun icra başçısı olub.
