Gəncə yaxınlığında yerləşən Göygöl rayonunun Balçılı kəndində qəbiristanlığa aparan yolun yenilənməsi istiqamətində işlər görülür.
Gencexeber.az-ın məlumatına görə, layihə kənd sakinlərinin təşəbbüsü və dəstəyi ilə həyata keçirilir. Hazırda yola asfalt örtüyü döşənir və görülən işlərin təxminən 30 faizi tamamlanıb. Ərazidə çoxsayda işçi və xüsusi texnika fəaliyyət göstərir, proses fasiləsiz davam etdirilir.
Bununla belə, layihənin sona çatdırılması üçün ayrılmış vəsait tükənmək üzrədir. Bu səbəbdən yolun tam istifadəyə verilməsi məqsədilə əlavə maliyyə dəstəyinə ehtiyac yaranıb.
Balçılı sakinləri kənddən olan imkanlı şəxslərə, xeyriyyəçilərə və aidiyyəti qurumlara müraciət edərək təşəbbüsə dəstək verməyə çağırırlar. Onlar bildirirlər ki, görülən işlərin başa çatdırılması qəbiristanlığa gediş-gəlişi daha rahat və təhlükəsiz edəcək.
