Goranboy Rayon Mərkəzi Xəstəxanasında yeni Hemodializ şöbəsinin açılışı olub.
TƏBİB bildirir ki, mərasimdə "Xroniki böyrək çatışmazlığından əziyyət çəkən şəxslərə göstərilən tibbi xidmətlərin keyfiyyətinin artırılması və müalicəsinin təşkilinin təkmilləşdirilməsi üzrə Komissiyanın" bir qrup üzvü və digər əməkdaşlar iştirak ediblər.
Goranboy rayonunda böyrək çatışmazlığından əziyyət çəkən xəstələr Hemodializ şöbəsindən səmərəli istifadə edə biləcəklər. Burada 10 ədəd müasir tipli Almaniya istehsalı olan “Fresenius Medical Care” hemodializ aparatı quraşdırılıb, xəstələrin istirahəti üçün bütün şərait yaradılıb. Mərkəzin otaqları yumşaq inventar, lazım olan tibbi avadanlıqlarla təmin edilib. Mərkəzdə ayda orta hesabla təqribən 60-dan çox xəstə dializ olunacaq. Hazırda Goranboyda bu kateqoriyadan olan 70-dən çox xəstə var.
Yeni Hemodializ şöbəsində 2 həkim, 2 texnik olmaqla, ümumilikdə 15 nəfər tibbi heyət xidmət göstərəcək.
