Gəncə şəhərinin üç fərqli ünvanında küçə işıqlandırmasının işləmədiyi bildirilir.
Gencexeber.az-a ünvanlanan çoxsaylı şikayətlərə görə, sakinlər axşam saatlarında yolların qaranlıq qalmasının təhlükəsizlik baxımından ciddi problem yaratdığını deyirlər.
Ünvanlardan biri Yeni İrəvan yaşayış massivində, Mehdi Hüseynzadə küçəsində müşahidə edilir. Digər problem isə Təbriz küçəsində qeydə alınıb. Sakinlərin sözlərinə görə, burada yolkənarı işıqlandırma sistemi işləmir. Nəticədə ərazi gecə saatlarında tamamilə qaranlıq qalır.
Oxşar vəziyyət Dədə Qorqud küçəsi, 252 ünvanında da müşahidə olunur. Müraciətdə bildirilir ki, burada şəhid ailələri yaşayır və küçə işıqları yanmadığı üçün sakinlər küçəni evlərinin eyvanlarından gələn işıqla işıqlandırmağa çalışırlar. Onların sözlərinə görə, bəzi obyektlərin qarşısında işıqlandırma olsa da, küçənin böyük hissəsi qaranlıq vəziyyətdədir.
Sakinlər aidiyyəti qurumlardan hər üç ünvanda küçə işıqlandırmasının bərpası üçün tədbir görülməsini xahiş edirlər.
