Gəncənin ən uzun küçələrindən biri olan Təbriz küçəsində yolun yararsız vəziyyətə düşməsi sürücülər üçün ciddi problem yaradıb.
Gencexeber.az-a daxil olan çoxsaylı şikayətlərdə bildirilir ki, III MDB Oyunlarından öncə ərazidə su və kanalizasiya sistemlərinin çəkilişi zamanı yol örtüyü dağılıb. Daha sonra oyunlara hazırlıq çərçivəsində Təbriz küçəsinin "Milli market"dən "Daş körpü" adlanan hissəyədək olan ərazisində yalnız müvəqqəti yamaq işləri aparılıb. Şəhərin mərkəzindən "Milli market"ə qədər olan hissəyə isə yeni asfalt örtüyü salınıb.
Hazırda "Daş körpü" adlanan hissəsi, yəni "R20" – Gəncə-Daşkəsən yolu istiqamətində olan ərazidə vəziyyət kritik olaraq qalır. Sakinlərin və sürücülərin sözlərinə görə, həmin hissədə yol artıq normal hərəkətin təşkili üçün yararsız hala düşüb.
Belə ki, küçədə yaranan iri çuxurlar səbəbindən avtomobillərin şəhərdə icazə verilən sürət həddi ilə hərəkət etməsi mümkünsüz olub. Sürücülər nəqliyyat vasitələrinə ziyan dəyməməsi üçün daim sürəti minimum həddə endirməyə məcbur qalırlar.
Yağışlı havalarda isə vəziyyət daha da ağırlaşır. Çuxurlara dolan yağış suları yolun müxtəlif hissələrində iri gölməçələr yaradır. Bu isə həm sürücülər üçün təhlükə yaradır, həm də avtomobillərin hansı nöqtədə dərin çuxura düşəcəyini əvvəlcədən müəyyən etməyi çətinləşdirir.
Şikayətçilər bildirirlər ki, küçənin bu hissəsində əsaslı təmir işlərinin aparılmasına ciddi ehtiyac var. Onlar aidiyyəti qurumları Təbriz küçəsində yaranmış problemin aradan qaldırılması üçün təxirəsalınmaz tədbirlər görməyə çağırırlar.
