Gəncə şəhərində yeniyetmə qız cəsarətini və soyuqqanlılığını nümayiş etdirib.
Gencexeber.az-ın məlumatına görə, Gəncəçay çayının şəhərin Azərbaycan bayrağı küçəsi ərazisindən keçən hissəsində, Gəncə Dövlət Milli Dram Teatrının qarşısında yeniyetmə qızlardan birinin çantası ehtiyatsızlıq nəticəsində çayın məcrasına düşüb.
Qızlar yardım çağırmaq əvəzinə, təşəbbüsü öz əlinə alıblar. Onlardan biri tərəddüd etmədən çayın məcrasına enərək çantanı götürüb və qısa müddət ərzində yenidən yuxarı qalxmağa müvəffəq olub.
Hadisəni çayın qarşı tərəfində izləyən sakinlər yeniyetmənin cəsarətini alqışlarla qarşılayaraq "Gəncənin qızları qoçaq olurlar" deyiblər.
