Gəncənin bir sıra yaşayış massivləri və şəhərin mərkəzini əhatə edən bir neçə ərazi məişət tullantıları ilə çirkləndirilib.
Gencexeber.az-a daxil olan çoxsaylı şikayətlərə görə, problemli ərazilər sırasında , eləcə də "Sevən Ürəklər" şadlıq sarayının yanı, Məhəmməd Hüseyn Şəhriyar, Mehdi Hüseyn və Məmmədbağır bəy Şeyxzamanov küçələri, həmçinin Yeni Gəncə qəsəbəsində yerləşən 2 nömrəli tam orta məktəbin arxasındakı ərazi yer alır.
Sakinlərin sözlərinə görə, bəzi ərazilərdə zibil konteynerlərinin sayının az olması, əhalinin sıx məskunlaşması və tullantıların vaxtında daşınmaması nəticəsində antisanitar vəziyyət yaranıb. Onlar bildirirlər ki, xüsusilə isti hava şəraitində ətrafa kəskin qoxu yayılır, bu isə həm ətraf mühitə, həm də insanların sağlamlığına mənfi təsir göstərir.
Narazılıq doğuran məkanlardan biri də şəhərin mərkəzində yerləşən Gəncə Dövlət Filarmoniyasının arxa hissəsidir. Vətəndaşların sözlərinə görə, ərazidə tullantıların yığılması səbəbindən piyadaların hərəkəti çətinləşib və xoşagəlməz qoxu yaranıb.
Sakinlər aidiyyəti qurumlardan qeyd olunan ünvanlarda təmizlik işlərinin gücləndirilməsini, zibil konteynerlərinin sayının artırılmasını və ərazilərə mütəmadi nəzarətin təmin olunmasını xahiş edirlər.
