Gəncə şəhər Abbas Səhhət adına 1 nömrəli xəstəxana ilə bağlı şok iddialar səsləndirilib.
Gencexeber.az-a şəhər sakini Ramiz Hüseynov tərəfindən bildirilib ki, dayısı Bahəddin Mujipov gecə saatlarında təcili tibbi yardım avtomobili ilə adı çəkilən tibb ocağına gətirilib. Onun sözlərinə görə, sınıqları olan şəxsin yaxınlarına xəstəxanada boş yer olmadığı deyilib.
Ramiz Hüseynov iddia edir ki, bu səbəbdən xəstə gecəni dəhlizdə keçirməli olub. Habelə xəstəxanada palataların müəyyən məbləğ qarşılığında verildiyi bildirib.
Tibbi Ərazi Bölmələrini İdarəetmə Birliyi (TƏBİB) tərəfindən Gencexeber.az-a təqdim edilən açıqlamada bildirilib ki, 1967-ci il təvəllüdlü B.Mujipov 03.06.2026-cı il tarixində saat 02:20 radələrində tibb müəssisəsinin nəzdində fəaliyyət göstərən Abbas Səhhət adına Xəstəxanaya həqiqətən hospitalizasiya olunub.
"Müayinə zamanı pasiyentə qabırğaların sınığı diaqnozu təyin edilib, ona zəruri tibbi xidmətlər göstərilib və Cərrahiyyə şöbəsində stasionar müalicəyə cəlb olunub.
Pasiyentə ümumi palatada (4 nəfərlik) yer təklif edilsə də, o, ümumi otaqda qalmaqdan imtina edərək fərdi yer tələb edib.
Həmin vaxt boş fərdi otaq mövcud olmadığından, tibb personalının izahat və tövsiyələrinə baxmayaraq, pasiyent palataya yerləşməyib və gecəni öz istəyi ilə dəhlizdə keçirib. Səhər saatlarında isə şöbədə palataya yerləşdirilib.
Sosial şəbəkələrdə yayılan görüntülərdə gündüz saatlarında bəzi otaqların boş görünməsi xəstəxananın iş rejimi ilə əlaqədardır. Belə ki, hər gün səhər saatlarında müalicəsi başa çatan xəstələr evə buraxılır, palatalar növbəti pasiyentlərin qəbulu üçün hazırlanır", - TƏBİB-dən bildirilib.
Qeyd edilib ki, hazırda pasiyentin müalicəsi müvafiq şöbədə davam etdirilir. Əlavə olaraq faktla bağlı TƏBİB tərəfindən də araşdırma aparılır. Nəticələrə uyğun olaraq müvafiq addımlar atılacaq.
