Gəncədə piyadaların təhlükəsiz şəkildə yolu keçməsi üçün quraşdırılan idarə olunan işıqforun düyməsi aylardır ki, işləmir.
Gencexeber.az-a daxil olan çoxsaylı şikayətlərə əsasən, sözügedən hal şəhərin Nizami Gəncəvi prospektində, "Ramada Plaza" hotelinin yaxınlığında müşahidə edilir. Sürətin yüksək olduğu ərazidə piyadalar avtomobil axınını qısa müddətlik belə saxlada bilmir. Nəticədə vətəndaşlar yolu keçmək üçün ya qarşı tərəfdə kiminsə düyməni basmasını gözləyir, ya da həyatlarını riskə ataraq nəqliyyatın intensiv hərəkəti fonunda yolu keçməyə məcbur qalırlar.
Sakinlərin sözlərinə görə, vəziyyət xüsusilə uşaqlar üçün ciddi təhlükə yaradır:
"Uşaqlar yolu keçə bilmir. Ya qarşı tərəfdə kimsə olanda deyirlər ki, düyməni bassınlar, ya da məcbur qalıb həyatlarını təhlükəyə ataraq yolu keçirlər", – sakin bildirib.
Şikayətçilər aidiyyəti qurumlardan problemin aradan qaldırılmasını və işıqforun normal fəaliyyətinin bərpa olunmasını tələb edirlər.
