Gəncə şəhərinin Şəddadilər və Mehdi Hüseynzadə küçələrinin sakinləri uzun illərdir yol problemi ilə üz-üzə qaldıqlarını bildirirlər.
Gencexeber.az-a şikayətlərini bildirən vətəndaşların sözlərinə görə, hər iki küçədə asfalt örtüyünün olmaması nəqliyyatın hərəkətini çətinləşdirir, yağışlı havalarda isə vəziyyət daha da ağırlaşır.
Onlar bildirirlər ki, Mehdi Hüseynzadə küçəsi təxminən 30 il öncə sonuncu dəfə asfaltlanıb. Yolda dərin çuxurlar yaranıb, toz və palçıq gündəlik həyata ciddi narahatlıq yaradır.
Xüsusilə Şəddadilər küçəsində vəziyyət daha acınacaqlıdı. Belə ki, bu küçə ictimai nəqliyyat marşrutudur. 7 və 12 nömrəli avtobuslar hər gün həmin yoldan istifadə edir.
Problemdən Gəncə şəhəri Səməd Vurğun adına 41 nömrəli təbiət və humanitar fənlər təmayüllü liseyin yaxınlığında yaşayan vətəndaşların da əziyyət çəkdiyi qeyd olunur.
Sakinlər aidiyyəti qurumlardan hər iki küçənin asfaltlanmasını və uzun illərdir davam edən yol probleminin aradan qaldırılmasını xahiş edirlər.
