Gəncə şəhəri Mir Cəlal Paşayev adına 39 saylı tam orta məktəbdə bu gün keçirilən Təbiət fənni dərsi zamanı xoşagəlməz hadisənin baş verdiyi iddia olunur.
Gencexeber.az-a daxil olan məlumata görə, hadisə 5b sinfində qeydə alınıb. Şagirdlərdən birinin valideyni, Azərbaycan Uşaq Fondunun Gəncə şəhər sədri Gülnar Günəşli bildirib ki, adıçəkilən fənni tədris edən müəllimə Tünzalə Qasımova əvvəlcə azyaşlı şagirdlərdən birini, daha sonra isə sinifdə oxuyan uşaqların valideynlərini və ailələrini təhqir edib.
Şikayətçinin sözlərinə görə, müəllimin əsəbiləşərək emosiyalarını cilovlaya bilmədiyi və ağır ifadələr işlətdiyi anlar redaksiyamıza təqdim olunan videogörüntülərdə əksini tapıb. Bildirilib ki, həmin görüntülərdə səslənən ifadələr məhz bu gün — aprelin 8-də Təbiət fənninin tədrisi zamanı qeydə alınıb.
İddia olunur ki, bu hal ilk dəfə baş vermir. Valideynin sözlərinə əsasən, tədris ilinin əvvəlindən etibarən dərslər zamanı şagirdlər mütəmadi olaraq yüksək tonla danlanılır və təhqiredici ifadələrə məruz qalırlar.
