Gəncədə gecə saatlarında sakinlərin narahatlığına səbəb olan iaşə obyekti fəaliyyətini dayandırıb.
Gencexeber.az xəbər verir ki, söhbət şəhərin Mirzə Abbas Abbaszadə küçəsində yerləşən əyləncə obyektindən gedir. Ərazidə yaşayan sakinlər dəfələrlə gecə saatlarınadək davam edən yüksək səsli musiqi, səs-küy və nalayiq ifadələrin işlədilməsi ilə bağlı narazılıqlarını ifadə ediblər. Onların sözlərinə görə, yaranmış vəziyyət insanların istirahətinə mane olur, ərazidə normal yaşayış mühitini pozurdu.
Məsələ tərəfimizdən işiqlandırıldıqdan sonra polis əməkdaşları qeyd olunan ünvanda profilaktik tədbirlər həyata keçirmişdi. Yoxlama zamanı obyektin qanunvericiliklə müəyyən edilmiş vaxtdan kənar saatlarda məişət səs-küyünə yol verdiyi müəyyən olunmuşdu.
Habelə, obyekt sahibi inzibati protokollar tərtib edilməklə cərimələnmişdi.
Əldə etdiyimiz məlumata görə, ictimai tənqid və aidiyyəti qurumların nəzarət tədbirlərinin gücləndirilməsindən sonra isə sözügedən obyekt fəaliyyətini dayandırıb.
