Gəncədə bir neçə ünvanda kanalizasiya və su xətləri partlayıb.
Gencexeber.az məlumat verir ki, şəhərin müxtəlif ərazilərində kanalizasiya və içməli su xətləri ilə bağlı ciddi problemlər yaranıb.
Mahrasa bağı yaşayış massivində, Şota Rustaveli küçəsində yerləşən bina 15-in qarşısında asfalt səthinin altından keçən kanalizasiya borusu partlayıb. Nəticədə ərazidə iri gölməçələr əmələ gəlib, çirkab suları üfunət saçır. Sakinlərin sözlərinə görə, həmçinin su borusu da zədələnib, buna görə binaya su zəif gəlir:
"Çənlər dolmur, su az gəlir. Qonşular birlikdə pul yığıb su maşını ilə doldururlar", – sakin şikayət edir.
Eyni problemlər Pasyolka adlanan ərazidə, 9-cu kvartal, Dədə Qorqud küçəsi, bina 1q ünvanında da yaşanır. Vətəndaşların sözlərinə görə, binanın kanalizasiya sistemi daima daşır, nəticədə zirzəmi və bina ətrafı çirkab suları ilə dolur.
Bundan başqa, Aida İmanquliyeva küçəsi, bina 17-də də analoji vəziyyət hökm sürür. Məlumata görə, burada kanalizasiya sistemi aylardır daşma vəziyyətindədir, lakin məsul qurumlar hələ də tədbir görmürlər:
"Aidiyyəti orqanlara dəfələrlə məlumat vermişik, amma heç kim baxmır" – sakinlər əlavə ediblər.
Şəhər sakinləri məsul qurumlardan problemi aradan qaldırmaq üçün təcili tədbirlər görülməsini tələb edirlər.
