2026-cı il yanvar-mart aylarında Gəncə şəhərində sənayenin vəziyyəti haqqında statistik məlumatlar açıqlanıb.
Gencexeber.az-a Gəncə Şəhər Statistika İdarəsindən verilən məlumata görə, 2026-cı ilin ilk rübündə sənaye müəssisələri və bu sahədə fəaliyyət göstərən fərdi sahibkarlar tərəfindən 187,7 milyon manatlıq və ya 2025-ci ilin müvafiq dövrü ilə müqayisədə 5,8 faiz çox sənaye məhsulu istehsal edilib və xidmətlər göstərilib.
Sənaye məhsulunun 0,8 faizi mədənçıxarma, 87,0 faizi emal, 10,5 faizi elektrik enerjisi, qaz və buxar istehsalı, bölüşdürülməsi və təchizatı, 1,7 faizi isə su təchizatı, tullantıların təmizlənməsi və emalı sektorlarında istehsal olunub.
Sənayedə qeyri-dövlət sektorunun payı 75,2 faiz olub. Ümumi istehsalın 83,9 faizi sənaye məhsullarının istehsalı, 16,1 faizi isə sənaye xarakterli xidmətlərin göstərilməsi hesabına yaradılıb.
Emal sektorunun müəssisələri tərəfindən 139,9 milyon manatı, yaxud 85,7 faizi qeyri-dövlət sektoruna aid olmaqla 163,3 milyon manatlıq məhsul istehsal edilib və sənaye xarakterli xidmətlər göstərilib, onlardan 83,6 milyon manat metallurgiya sənayesi məhsulları, 33,6 milyon manat qida məhsulları istehsalı, 23,8 milyon manat avtomobil, qoşqu və yarımqoşquların istehsalı, 5,1 milyon manat içki istehsalı və 17,2 milyon manat digər məhsulların istehsalı olub.
Elektrik enerjisi, qaz və buxar istehsalı, bölüşdürülməsi və təchizatı sektorunun müəssisələri tərəfindən 2026-cı il yanvar-mart aylarında 19,6 milyon manatlıq, su təchizatı, tullantıların təmizlənməsi və emalı sektorunda 3,2 milyon manatlıq məhsul istehsal edilib və xidmətlər göstərilib.
