Gəncə Dövlət Universitetinin müəllimi elmi dərəcəyə layiq görülüb.
Gencexeber.az-ın məlumatına görə, Gəncə Dövlət Universitetinin müəllimi Məhərrəm Ramiz oğlu Babayev elmi uğur əldə edib. Azərbaycan Respublikası Prezidenti yanında Ali Attestasiya Komissiyasının qərarına əsasən o, iqtisad elmləri üzrə fəlsəfə doktoru elmi dərəcəsinə layiq görülüb.
Məhərrəm Babayev həm elmi, həm də təhsil sahəsində fəal mütəxəssis kimi tanınır. O, Elm və Təhsil Nazirliyinin Təhsildə Keyfiyyət Təminatı Agentliyinin eksperti, eləcə də Dövlət İmtahan Mərkəzinin imtahan rəhbəri kimi fəaliyyət göstərir.
O, bakalavr təhsilini "Menecment" ixtisası üzrə, magistratura təhsilini "İqtisadiyyatın hüquqi tənzimlənməsi" ixtisası üzrə başa vurub. Doktorantura təhsilini isə "Ümumi iqtisadiyyat" ixtisası üzrə davam etdirərək "Azərbaycan Respublikasında iqtisadiyyatın tənzimlənməsi mexanizmlərinin təkmilləşdirilməsi istiqamətləri" mövzusunda araşdırma aparıb.
