Gəncə kikboksçusu il başlayandan artıq 3-cü qızıl medala sahib çıxıb.
Gencexeber.az məlumat verir ki, Gəncə şəhəri İsmət Qayıbov adına 1 nömrəli tam orta ümumtəhsil məktəbin 7B sinif şagirdi Hüseyn Elmar oğlu Paşayev kikboksinqdə qazandığı nailiyyətlərlə diqqət çəkib.
Belə ki, o, 15 fevral 2026-cı il tarixində Bakı şəhərində keçirilən, Şəhid Səbuhi Əliyevin xatirəsinə həsr olunan Şimal İdman Klubunun Birinciliyində 2013-cü il təvəllüdlü oğlanlar arasında 35 kq çəki dərəcəsində I yeri tutmağa müvəffəq olub.
Bundan öncə, Hüseyn 1 fevral 2026-cı il tarixində Azərbaycan Gənclər Günü münasibətilə təşkil olunan "İstiqlal" İdman Klubunun açıq turnirində də I yer qazanıb.
Həmçinin 13 yaşlı idmançı 18 yanvar 2026-cı il tarixində 20 Yanvar şəhidlərinin xatirəsinə həsr olunan Sensey Kikboksinq Klubunun yoldaşlıq görüşündə 2013-cü il təvəllüdlü idmançılar arasında 35 kq çəki dərəcəsində I yerə layiq görülərək diplomla təltif olunub.
Qeyd edək ki, gənc idmançının ardıcıl uğurları onun yüksək hazırlığından və əzmkarlığından xəbər verir.
