Xəbər verdiyimiz kimi, Dövlət Sərhəd Xidmətinin Biləsuvar rayonunda yerləşən hərbi hissəsinin Gəncə şəhərindən olan əsgəri Hüseyn Hüseynov özünü güllələyərək həyatına qəsd edib.
Qafqazinfo.аz xəbər verir ki, əsgər Hüseyn Hüseynovun intihar etməsi ilə bağlı komandiri həbs edilib. Şirvan Apellyasiya Məhkəməsi Hərbi Prokurorluğun protesti əsasında belə qərar çıxarıb.
Yuxarı instansiya Cəlilabad Hərbi Məhkəməsinin həbs qətimkan tədbirinin seçilməsindən imtina edilməsi ilə bağlı qərarı pozub. Tabelikdə olan hərbi qulluqçulara qarşı zorakı hərəkətlər etməkdə (CM-nin 329.2.1, 329.2.2 və 329.3-cü maddələri) təqsirləndirilən kapitan Mahmud Səfaralıyev məhkəmə zalında həbs edilib.
Zabitə verilmiş ittiham gələcəkdə sübuta yetirilərsə onu 3 ildən 8 ilədək həbs cəzası gözləyir.
Məlumat üçün bildirək ki, Gəncə şəhər Əhməd Cavad adına 2 nömrəli tam orta məktəbin məzunu olan əsgər Hüseyn Hüseynovun komandiri tərəfindən çoxsaylı təhqir və zorakılığa məruz qaldığı üçün noyabrın 15-də intihar etdiyi iddia olunur. Həmçinin kapitan Səfaralıyevin başqa əsgərlərə qarşı da qanunsuzluqlara yol verdiyi üçün vəzifəsindən azad edildiyi bildirilir.
Bundan öncə kapitan sonuncu hadisə ilə bağlı prokurorluq tərəfindən tutulsa da Cəlilabad Hərbi Məhkəməsi həbs qətimkan tədbirinin seçilməsi üçün qanunda nəzərdə tutulmuş prosessual əsaslar müəyyən edilməyini əsas gətirərək onu sərbəst buraxmışdı.
Qeyd edək ki, mərhum Hüseyn Hüseynov noyabrın 16-da "Köhnə Səbiskar" kimi tanınan Gəncə şəhər 1 saylı qəbiristanlığında torpağa tapşırılıb.
