Almaniyada çalışan gəncəli həkim peşəkar fəaliyyəti ilə seçilərək rəhbər vəzifəyə təyin olunub.
Gencexeber.az məlumat verir ki, əslən Gəncə şəhərindən olan 38 yaşlı həkim Toğrul Çingiz oğlu Məmmədli Almaniyanın Hagen şəhərində yerləşən Katolik Xəstəxanasının Əl və Mikrocərrahiyyə bölməsinə rəhbər təyin edilib.
Məlumata görə, Toğrul Məmmədli 8 mart 1988-ci ildə Gəncə şəhərində anadan olub. O, Bakı şəhərində 134 nömrəli tam orta məktəbi bitirib, 2011-ci ildə Azərbaycan Tibb Universitetindən məzun olub. 2012-ci ildə rezidenturaya qəbul olunan həkim təhsilini və peşə fəaliyyətini Almaniyada davam etdirib.
Bildirilib ki, Dr. Toğrul Məmmədli çalışdığı tibb müəssisəsində yüksək peşəkarlığı ilə seçilərək kollektiv arasında hörmət qazanıb. Onun Əl və Mikrocərrahiyyə sahəsində göstərdiyi fəaliyyət bu istiqamətin inkişafında mühüm rol oynayıb.
