Gəncəli həkim tibb üzrə fəlsəfə doktoru elmi adına layiq görülüb.
Gencexeber.az-ın məlumatına görə, həkim Nizami Qayıbov bir müddət öncə Türkiyənin Erciyes Universiteti tərəfindən verilmiş Ağız və Üz-Çənə Cərrahiyyəsi ixtisası üzrə fəlsəfə doktoru diplomuna layiq görülüb. Azərbaycan Respublikasının Prezidenti yanında Ali Attestasiya Komissiyası tərəfindən qəbul edilən qərara əsasən, onun xarici diplomu Azərbaycanda tanınıb və stomatologiya ixtisası üzrə tibb elmləri sahəsində fəlsəfə doktoru elmi dərəcəsinə ekvivalent hesab olunub.
Komissiya tərəfindən keçirilən tədbirdə xarici ölkələrdə verilmiş elmi dərəcələrin tanınması ilə bağlı şəhadətnamələr sahiblərinə təqdim olunub. Nizami Qayıbov da bu şəxslər arasında yer alıb.
Qeyd edək ki, Nizami Bəxtiyar oğlu Qayıbov 1994-cü ildə Gəncədə anadan olub. O, orta təhsilini 44 nömrəli ingilis dili təmayüllü məktəb-liseyində alıb. 2011-ci ildə Azərbaycan Tibb Universitetinin Stomatologiya fakültəsinə qəbul olunub. 2016–2019-cu illərdə ümumi stomatologiya üzrə rezidentura təhsili alıb.
2019-cu ildə Türkiyənin Erciyes Universiteti Səhiyyə Elmləri İnstitutunda Ağız və Üz-Çənə Cərrahiyyəsi ixtisası üzrə doktorantura təhsilinə başlayan Nizami Qayıbov, 2025-ci ildə təhsilini uğurla tamamlayıb. O, elmi və praktiki fəaliyyət dövründə ağız və üz-çənə cərrahiyyəsi sahəsində müxtəlif tədqiqat layihələrində iştirak edib, beynəlxalq indeksli jurnallarda 3 elmi məqalənin müəllifi, 2 məqalənin isə həmmüəllifi olub.
