Gəncə Dövlət Milli Dram Teatrının aktrisası Nailə Əhmədovanın anası, şəhid mayor Mədət Əhmədovun xanımı Elmira Nadir qızı Məmmədova 68 yaşında vəfat edib.
Gencexeber.az-a bu barədə teatrşünas-tənqidçi Anar Ərtoğrul Burcəliyev məlumat verib. Bildirilib ki, Elmira Məmmədova qəflətən ürək tutmasından dünyasını dəyişib.
Qeyd edək ki, şəhid Mədət Əhmədov 1980-ci ildən etibarən Gəncə şəhərində yerləşən hərbi aeroportda "İl-76" markalı təyyarədə işləyib. O, 1983-1984-cü illərdə təyyarəçi işlədiyi müddət ərzində Hindistanda, Əfqanıstanda, Vyetnamda dövlət əhəmiyyətli xüsusi tapşırıqlı səfərlərdə olub.
Həmçinin Vyetnam dövləti tərəfindən tərif edilib. Erməni daşnakları ilə başlayan Qarabağ müharibəsi dövründə Mədət Əhmədov 130 saylı hərbi hissənin tərkibində baş leytenant rütbəsi ilə bölük komandiri, eləcə də rabitə rəisi vəzifələrində xidmət edib.
Mədət Hümbət oğlu Əhmədov 1994-cü il yanvar ayının 1-də Ağdərə uğrunda gedən qızğın döyüşlərin birində qəhrəmancasına şəhidlik zirvəsinə icalıb. Gəncə şəhər Şəhidlər Xiyabanında dəfn olunub. Mədət Əhmədova ölümündən sonra mayor rütbəsi verilib.
