Gəncənin Tağı Arani küçəsində yerləşən Gəncə Yaşayış Kompleksinin (MİDA) 3 saylı binasının ərazisinin məişət tullantıları ilə çirkləndirilməsi əhalinin narazılığına səbəb olub.
Gencexeber.az-a müraciət edən sakinlərin sözlərinə görə, zibil qabları gec-gec boşaldıldığından ərazidə antisanitar vəziyyət yaranır. Nəticədə tullantılar konteynerlərdən kənara daşır, ətrafa səpələnir və xoşagəlməz qoxu yayılır.
Sakinlər bildirirlər ki, yay aylarında yaranan üfunət səbəbindən mənzillərinin pəncərələrini açıq saxlaya bilmirlər. Onların sözlərinə görə, problem uzun müddətdir davam edir.
Vətəndaşlar qeyd edirlər ki, ərazi ara-sıra təmizlənsə də, tullantılar mütəmadi və vaxtında daşınmadığı üçün problem qısa zamanda yenidən təkrarlanır.
Sakinlər aidiyyəti qurumlardan zibilin daşınma qrafikinə yenidən baxılmasını və ərazidə sanitar vəziyyətin daim nəzarətdə saxlanılmasını xahiş edirlər.
