Ötən ilin noyabrında Gəncə-Şəmkir yolunun Göygöldən keçən hissəsində "Mercedes GL 550" markalı avtomobilin qəzaya uğraması hadisəsi ilə bağlı açılmış cinayət işi üzrə məhkəmə prosesi başa çatıb.
Gəncə Ağır Cinayətlər Məhkəməsində hadisə vaxtı avtomobili idarə edən 21 yaşlı Gülru Kərimovaya (ad şərtidir) hökm oxunub. İlkin məlumatlarda qəza zamanı avtomobilin 1990-cı il təvəllüdlü Əhliman Ramiz oğlu Abdi tərəfindən idarə edilməsi bildirilsə də, bu, təsdiqini tapmayıb.
Araşdırmalarla müəyyən edilib ki, hadisə vaxtı Əhliman tanışı Hikmət Vəlizadə və digər tanışları ilə birgə Gəncədəki "Karizma" restoranında yeyib-içiblər və başqa restoranda işləyən qızları məclisə dəvət ediblər.
Gecə saat 2 radələrində restoranı tərk edərkən Əhliman sərxoş olduğunu deyərək sükan arxasına Gülrunun keçməsini istəyib, özü öndə, Hikmətlə digər qız isə arxada oturub. Onlarla birgə məclisdə iştirak edən şəxslərdən bir neçəsi Leylanın (şərti) sürdüyü "Chevrolet Equinox" markalı avtomobilə əyləşib. Yolda olarkən sürücü qızlar ötüşməyə başlayıblar və idarəetmədən çıxan avtomobil divara çırpılıb. Nəticədə Əhlimanla Hikmət həlak olublar.
Məhkəmədə bildirilib ki, Gülrunun 2023-cü il təvəllüdlü bir övladı var. Onun sürücülük hüququnun olmaması da müəyyən edilib. Gəncə Ağır Cinayətlər Məhkəməsinin hökmü ilə ona 7 il 6 ay həbs cəzası verilib və məhkəmə zalındaca həbs edilib.
Mənbə: qafqazinfo.аz
