Gəncədə Yeni il bayramı ilə əlaqədar şəhərin mərkəzində yolkanın hələ də qurulmaması sakinlər arasında narahatlıq doğurub.
Gencexeber.az-a mövzu ilə bağlı onlarla şəhər sakini müraciət edərək bildirib ki, bayrama sayılı günlər qalsa da, Gəncə küçələrində ənənəvi şənlik ab-havası müşahidə olunmur. Onların sözlərinə görə, baş meydanda yolkanın olmaması bayram tədbirlərinin bu il keçirilib-keçirilməyəcəyi barədə müəyyən suallar yaradıb.
Hər il dekabr ayında Gəncə Şəhər İcra Hakimiyyətinin binası qarşısında iri yolka quraşdırılırdı. Lakin bu il hələlik belə bir hazırlıq görülməyib.
Qeyd edək ki, paytaxt Bakıda və Sumqayıt şəhərində iri şam ağacları xeyli müddət öncə artıq ucaldılıb.
