Gəncənin müxtəlif ərazilərində yerləşən uşaq oyun meydançalarının baxımsız vəziyyətdə olması sakinlərin narazılığına səbəb olub.
Gencexeber.az-a daxil olan müraciətlərə əsasən, Nəriman Nərimanov küçəsində yerləşən 32 nömrəli binanın həyətindəki uşaq atraksionlarından təyinatı üzrə istifadə olunmur. Sakinlərin sözlərinə görə, oyun qurğularında yuyulmuş xalçalar qurudulduğundan uşaqlar asudə vaxtlarını meydançada keçirə bilmirlər.
Digər problem Avtozavod qəsəbəsində, Süleyman Rəhimov küçəsi 9 ünvanında müşahidə edilir. Burada hələ də köhnə dəmir konstruksiyalardan ibarət uşaq atraksionları qalmaqdadır. Paslanmış və yararsız vəziyyətə düşmüş qurğular uşaqların xəsarət alması riskini artırır. Bundan əlavə, ərazidə təmizlik işlərinin lazımi səviyyədə aparılmaması uşaqların antisanitar şəraitdə oynamasına səbəb olur.
Oxşar vəziyyət Üzeyir Hacıbəyli küçəsində, sakinlər arasında "Savxoz Nizami" kimi tanınan yaşayış massivində də yaşanır. Buradakı uşaq meydançasında SSRİ dövründən qalan atraksionlar artıq istismar müddətini başa vurub və istifadə üçün yararsız vəziyyətə düşüb.
Sakinlər aidiyyəti qurumlardan uşaq meydançalarının təmizlənməsini, köhnə və təhlükəli oyun qurğularının yenilənməsini, eləcə də həyətlərdə uşaqlar üçün təhlükəsiz və müasir oyun mühitinin yaradılmasını xahiş edirlər.
