Xəbər verdiyimiz kimi, dünən, mayın 25-də Gəncədə "Dubay" bazarının yaxınlığında, Tağı Arani küçəsində yolun çökməsi nəticəsində yol-nəqliyyat hadisəsi baş verib.
Gencexeber.az-a daxil olan çoxsaylı şikayətlərə əsasən, hadisəyə səbəb avtomobil yolunun yararsız vəziyyətə düşməsi olub. Sakinlərin sözlərinə görə, qısa müddətli yağışdan sonra küçə su altında qalıb, kanalizasiya sistemi isə daşıb.
Bildirilib ki, günlərlə davam edən bu proses nəticəsində yolun bir çox hissəsində asfalt qatının altı yuyulub və çökəkliklər əmələ gəlib. Məhz həmin çökəkliklərdən birinə iritonnajlı yük avtomobili düşüb.
Vətəndaşlar küçədə funksiyasını yerinə yetirməyən kanalizasiya sisteminin yenilənməsini, yaxud normal fəaliyyətinin təmin olunmasını, həmçinin yolun norma və qaydalara uyğun şəkildə asfaltlanmasını tələb edirlər.
