Gəncə şəhərində pensiya alan şəxslərin sayı 32 min 734 nəfər təşkil edir. Bu da şəhərin təxminən 331 min nəfər olan əhalisinin hər 10 nəfərindən birinin pensiyaçı olduğunu göstərir.
Gencexeber.az-a Gəncə Şəhər Statistika İdarəsindən tərəfindən təqdim edilən məlumata əsasən, sözügedən göstəricilər 2026-cı il yanvarın 1-nə olan dövrə aiddir. Belə ki, pensiya alanlardan 19 min 442 nəfəri yaşa görə, 9 min 122 nəfəri əlilliyə görə, 4 min 170 nəfəri isə ailə başçısını itirməyə görə pensiya alır.
Bundan başqa, şəhərdə 2 min 751 ailəyə ünvanlı dövlət sosial yardımı təyin edilib. Bu yardımdan ümumilikdə 11 min 420 nəfər faydalanır.
Gəncədə sosial müavinət alanların sayı isə 14 min 98 nəfərdir. Onlardan 5 min 596 nəfərə yaşa görə, 5 min 298 nəfərə əlilliyi olan şəxslərə (18 yaş və yuxarı), 1 min 676 nəfərə ailə başçısını itirməyə görə, 1 min 51 nəfərə isə əlilliyi olan uşaqlara (18 yaşadək) müavinət verilir.
Eyni zamanda, bəzi kateqoriya şəxslərin 180 uşağına, 1 yaşadək uşağı olan 89 ailəyə, beşdən çox uşağı olan qadınların 148 övladına, müddətli həqiqi hərbi xidmət hərbi qulluqçularının 10 uşağına da sosial müavinət ödənilir.
Bundan əlavə, özəlləşdirilən və idarəetməyə verilən dövlət müəssisələrində istehsalat qəzası və ya peşə xəstəliyi nəticəsində zərər çəkmiş işçilərə və onların ailə üzvlərinə 22 nəfər üzrə, əmək xəsarəti və ya peşə xəstəliyi nəticəsində zərərçəkən 9 nəfərə aylıq kompensasiya təyin olunub.
