Gəncə şəhər Mənzil Kommunal Təsərrüfatı İstehsalat Birliyi (MKTİB) tərəfindən Elbrus Allahverdiyev küçəsində, həmçinin Gəncə şəhər Fizika, Riyaziyyat və İnformatika Təmayüllü liseyin ərazisində təmizlik işləri aparılıb.
Gencexeber.az bildirir ki, MKTİB-nin Təmizlik şöbəsi, Ərazi Xidmət Sahələri, Təmir-Tikinti və Qəza xidməti şöbəsi əməkdaşlarının qatıldığı aksiya zamanı sözügedən ərazilər məişət və digər tullantılardan, toz-torpaq və xəzəldən təmizlənib.
Liseyin dəmir məhəccərləri MKTİB-nin əməkdaşları tərəfindən rənglənib. Tədris ocağının həyətindəki yaşıllıqlara aqrotexniki qulluq göstərilməklə yanaşı suvarılması da təmin edilib. Bununla paralel olaraq Elbrus Allahverdiyev küçəsində MKTİB-nin ağır texnikası vasitəsilə yeni ağac tinglərinin əkini üçün yerlər hazırlanıb. Həmçinin ərazidə qeyri-qanuni tikili inşa etmək məqsədi ilə yolun kənarına yığılan tikinti materialları qurumun texnikaları vasitəsilə ərazidən götürülüb.
