Gəncə şəhərinin Azərbaycan bayrağı küçəsində yaşayan aztəminatlı ailə uzun müddətdir qazsız qalıb.
Gencexeber.az xəbər verir ki, təkbaşına beş oğluna baxan Rufan Qasımov aidiyyəti qurumlardan ona və ailəsinə yardım edilməsini xahiş edir. Onun sözlərinə görə, köhnə ət kombinatının yerində inşa edilmiş, cəmi 16 kvadratmetr sahəsi olan evdə yaşayırlar. Lakin evin çıxarışı olmadığından, ev qazla təmin edilmir.
Valideyn bildirib ki, yaxınlıqdakı evlər mavi yanacaqla təmin olduğu üçün ərazidə qaz xətti mövcuddur. Qarşıdan gələn qış mövsümünü nəzərə alaraq uşaqları ilə birlikdə soyuqda qalmaqdan narahat olan R.Qasımov müvafiq qurumlara müraciət edib.
O, həmçinin aztəminatlı ailə kimi dövlət qeydiyyatında olduğunu vurğulayıb və məişət şəraitinin yaxşılaşdırılması üçün dəstək istəyib. Rufan Qasımov Gəncə Şəhər İcra Hakimiyyətindən evinin sahəsinin artırılması və sənədləşmə məsələsində kömək göstərilməsini xahiş edib.
