Gəncədə fəaliyyət göstərən "Takeshi Sushi Gəncə" restoranının məhsullarından balıq sümükləri çıxıb.
Gencexeber.az-a şikayətini bildirən şəhər sakininin iddiasına görə, dünən, dekabrın 15-i o, "Wolt" tətbiqi vasitəsilə sözügedən restorandan "Katana Set" sifariş edib və müqabilində 31 manat pul ödəyib. İddialara görə, sifariş edilən suşinin içərisi balıq sümükləri ilə dolu olub.
Müştəri yemək zamanı balıq sümüklərinin boğazında qaldığını iddia edib. Qeyd edilib ki, suşi kimi xüsusi hazırlanmalı olan qidalarda bu cür halların baş verməsi yolverilməzdir.
Məsələ ilə bağlı "Takeshi Sushi Gəncə" restoranının sahibi Gencexeber.az-a açıqlamasında bildirib ki, vətəndaşın haqlı iradı nəzərə alınaraq ona çatdırılan sifarişin pulunun bir qisminin qaytarılması və ya yeni sifarişin pulsuz çatdırılması təklif edilib. Sümüklərin müştərinin boğazında qalmasından xəbərdar olmadığını söyləyən sahibkarın sözlərinə görə, "Wolt" şirkəti restoranla əlaqə saxlayaraq məsələni araşdırdıqdan sonra vətəndaşın pulunu tam həcmdə qaytarıb.
