Yeni Gəncə qəsəbəsində yerləşən şəhid bulağı baxımsız vəziyyətə düşüb.
Gencexeber.az-a müraciət edən sakinlərin sözlərinə görə, söhbət şəhərin 28 May küçəsində, Qarabağ müharibələrində şəhid olmuş qəhrəmanların xatirəsinə yaradılmış guşəsindəki bulaqdan gedir. Vətəndaşların sözlərinə görə, uzun müddətdir əraziyə lazımi qaydada qulluq olunmadığından xatirə guşəsi acınacaqlı vəziyyətə düşüb.
Onlar bildirirlər ki, ərazini kol-kos basıb, ətrafa müxtəlif məişət tullantıları atılıb. Bulağın üç su kranından isə hazırda yalnız biri qalıb. Həmin krandan da əksər hallarda su gəlmir. Habelə bulaq əvvəllər daim istifadə olunsa da, hazırda faktiki olaraq yararsız vəziyyətdədir.
28 May küçəsində yaşayanlar xatirə guşəsinin təmizlənməsini, abadlaşdırılmasını və bulağın yenidən istifadəyə yararlı vəziyyətə gətirilməsini aidiyyəti qurumlardan xahiş edirlər.
