Gəncə şəhərində şəhid Nicat Qasımovun adına yeni park salınıb.
Gencexeber.az-ın məlumatına görə, Azərbaycan küçəsi 97a ünvanında yerləşən parkın yaradılması təşəbbüsü şəhər sakini, ictimai fəal Kamil Qasımova məxsusdur. O, bu məqsədlə Gəncə şəhər Kəpəz Bələdiyyəsinin rəhbəri Yaşar Abdullayevə, həmçinin Gənclər və İdman Nazirliyinə müraciət edib. Təşəbbüs müsbət qarşılanıb və ərazidə abadlıq işlərinə başlanılıb.
Təxminən 20 sot ərazini əhatə edəcək parkın bir hissəsində artıq uşaqlar üçün oyun meydançası salınıb və oyun qurğuları quraşdırılıb. Növbəti mərhələdə isə böyüklərin idman etməsi üçün xüsusi zona yaradılması nəzərdə tutulur.
Yeni istirahət və əyləncə guşəsində aparılan işlər davam etdirilir.
Qeyd edək ki, Nicat Elşən oğlu Qasımov 17 oktyabr 1991-ci ildə Gəncədə anadan olub. O, 33 nömrəli tam orta məktəbi bitirib.
2010-cu ildə həqiqi hərbi xidmətə çağırılıb. 2020-ci ilin sentyabr ayında Azərbaycan Ordusunda keçirilən hərbi təlimlərə cəlb olunub. Vətən müharibəsində iştirak edib. Murovdağ istiqamətində gedən döyüşlərdə vuruşub.
Nicat Elşən oğlu Qasımov 2 oktyabr 2020-ci ildə Kəlbəcər rayonunun azad olunması uğrunda gedən döyüşdə şəhidlik zirvəsinə ucalıb. İki gün sonra Gəncə şəhərinin Şəhidlər xiyabanında dəfn edilib.
Nicat Qasımov ölümündən sonra Prezident tərəfindən "Vətən uğrunda", "Kəlbəcərin azad olunmasına görə" və "Hərbi xidmətlərə görə" medalları ilə təltif olunub.
