Gəncə şəhərinin Gülüstan qəsəbəsində yerləşən Eldar Talıbov küçəsində ciddi infrastruktur problemi yaşanır.
Gencexeber.az-a daxil olan çoxsaylı şikayətlərə əsasən, qəsəbədə 38-ci və 39-cu binalardan başqa demək olar ki, bütün binaların qarşısında abadlıq işləri aparılıb, ərazi işıqlandırma sistemi ilə təmin olunub. Lakin qeyd olunan iki binanın qarşısı uzun müddətdir baxımsız vəziyyətdə qalır.
Sakinlərin sözlərinə görə, xüsusilə yağışlı havalarda vəziyyət daha da ağırlaşır. Yol palçıq içində qalır, nə uşaqların, nə də böyüklərin hərəkəti mümkün olur. Sakinlər gündəlik gediş-gəlişdə ciddi çətinliklərlə üzləşirlər.
Qeyd edək ki, 38-ci binada Vətən müharibəsi şəhidi Vaqif Vahid oğlu Əliyevin ailəsi yaşayır. Eyni zamanda Gülüstan qəsəbəsində yerləşən 12 saylı tam orta məktəb də şəhidin adını daşıyır.
Sakinlər aidiyyəti qurumlardan məsələyə laqeyd yanaşılmamasını, əraziyə baxış keçirilməsini və qısa müddətdə abadlıq, eləcədə işıqlandırma işlərinin həyata keçirilməsini xahiş edirlər.
