Türkiyə Respublikasının Iğdır Dağ Safari İdman Klubu və Kağızman Dağçılıq və Təbiət İdmanları Klubunun nümayəndə heyəti Azərbaycanın qərb regionuna işgüzar səfər edib.
Gencexeber.az-ın məlumatına görə, sözügedən tədbir Gəncə Regional Turizm İdarəsinin dəstəyi, Gəncə Dağçılıq Klubunun təşəbbüsü və təşkilatçılığı ilə həyata keçirilib.
Səfərin əsas məqsədi Kiçik Qafqazın, xüsusilə Murovdağ silsiləsinin dağçılıq, trekking və təbiət turizmi potensialını yerində qiymətləndirmək, regionun beynəlxalq dağ turizmi istiqamətində tanıdılması və iki qardaş ölkənin dağçılıq təşkilatları arasında əməkdaşlığın genişləndirilməsi olub.
Səfər çərçivəsində qonaqlar Gəncə və Göygöl şəhərlərinin turizm imkanları, təbii və tarixi-mədəni irsi ilə yaxından tanış olublar. Daha sonra Gəncə Dağçılıq Klubunun rəhbəri Mahir Hüseyn və klubun icraçı direktoru Ramil Lətifoğlunun rəhbərliyi ilə Kəpəz dağına zirvə yürüşü təşkil edilib.
Qatı duman, yağıntılı hava və məhdud görünmə şəraitinə baxmayaraq yürüş uğurla başa çatdırılıb. İştirakçılar Kəpəz massivində yerləşən 3072 metr hündürlükdəki Nizami zirvəsinə və 3066 metr hündürlükdəki Kəpəz zirvəsinə qalxaraq xatirə şəkilləri çəkdiriblər.
