Gəncə sakini şəhərdə suşi hazırlayan müəssisənin məhsullarından narazılıq edib.
Gencexeber.az-a şikayətini ünvanlayan xanımın iddiasına görə, o, "TikTok" sosial şəbəkəsində qarşısına çıxan "Suşi Gəncə" müəssisəsinin sosial şəbəkə səhifəsindən sifariş etdiyi suşiyə görə 35 manat ödəsə də, çatdırılan məhsul gözləntilərini doğrultmayıb. Şikayətçi bildirib ki, suşilər adətən təqdim edilən porsiyalardan xeyli kiçik olub, içərisində istifadə olunan bəzi məhsullar isə keyfiyyətsiz təsiri bağışlayıb.
"Sifarişdə istifadə edilən xiyarlar köhnə idi. Rollarda istifadə olunan məhsul pendirə bənzəmirdi, sanki başqa nəsə istifadə olunmuşdu. Suşini yedikdən sonra halım dəyişdi. Məhsulların keyfiyyətindən ciddi narazı qaldıq", – şikayətçi deyib.
Onun sözlərinə görə, narazılıqlarını müəssisənin rəhbərinə çatdırdıqdan sonra kobud münasibətlə qarşılaşıb. Şikayətçi iddia edir ki, onlara "35 yox, 50 manat ödəsəydiniz, başqa yerlərdəki kimi məhsul göndərərdik" məzmunlu cavab verilib.
Məsələ ilə bağlı "Suşi Gəncə"nin rəhbəri Sahibə Abdullayeva redaksiyamıza bildirib ki, satılan və istehlak olunan məhsullar geri qaytarılmır. Onun sözlərinə görə, sifarişçi məhsulu qəbul etməzdən əvvəl yoxlamalı, bəyənmədiyi halda isə geri qaytarmalı idi.
"Hamının ağız dadına uyğun məhsul təqdim etmək mümkün deyil. Müştəri ödədiyi məbləğin qarşılığında mümkün olan məhsulu əldə edib", – Sahibə Abdullayeva bildirib.
